Delegacije Demokratske narodne partije i Jugoslovenske komunističke partije Crne Gore predvođene predsjednicima Milanom Kneževićem i Radisavom Stanišićem položile su vijence na spomen obilježje Partizanu – borcu na Gorici.
Iz DNP-a su kazali da neprolazna ideja antifašizma i narodnooslobodilačke borbe danas posebno dobija na značaju “kad se fašizam i nacizam u modifikovanim geopolitičkim kontekstima pokušavaju predstaviti kao civilizacijski model i trend nametnut čovječanstvu u svrhu revizije prošlosti i obezličavanja budućnosti.”
“Zato je neophodno još energičnije i nepokolebljivije govoriti mlađim naraštajima o strahotama Drugog svjetskog rata i značaju Dana pobjede kad je zauzimanjem Rajhstaga od strane slavne Crvene armije i kapitulacijom Hitlerove Njemačke zaustavljen rat u Evropi. Ovom prilikom sa pijetetom i ponosom se prisjećamo slavnih predaka koji položiše svoje živote u odbrani i oslobođenju nekadašnje zajedničke domovine, uvjereni da njihova slavna žrtva nije bila uzaludna, već je postala svetionik rodoljublja i prkosa prema kome se i danas upravljamo”, poručili su iz te partije.
